到底「加價列車」點玩法？犀利咯，海洋公園尋日公布，由下月一日起，成人門票由現時嘅二百零八蚊大幅調升到二百五十蚊，而小童門票就由一百零三蚊加到一百二十五蚊，全年入場證收費亦調高一成幾。即係話，第時一家大細入園遊樂，閒閒地都畀多百幾大元。屈指一計，整體加價約兩成，對比○七年時嘅一成二加幅，簡直係史無前例咁刺激呀！

海洋公園解釋，受金融海嘯同豬流感影響，近兩個月嘅本地客已下跌一成，非本地客急跌三至四成，拖低全年入場人次。因為海洋公園係非牟利及非政府資助機構，需要支付擴建貸款利息，所以無可避免要加價。

叮！唔講幾乎唔記得，原來海洋公園仲係一個非牟利機構噃。太一叮記得嘅係，海洋公園入場人次連續五年創新高，舊年先勁賺二億幾。既然非牟利，家吓經濟環境咁差，海洋公園唔係應該減價吸客，同大家共度時艱嘅咩？殊不知，海洋公園不但唔肯回饋市民，反而逆市加價，一手趕走旅客，一手打劫市民。卻原來，大家一直睇漏隻字，「非牟利機構」係假，海洋公園係「非常牟利機構」至真。

唉，講開就一肚火，其實香港嘅「非常牟利機構」豈止海洋公園？呢啲機構嘅非常牟利行為有個共同特色，就係由特區政府一手造成。譬如話啲隧道公司加加加，而政府就不斷開綠燈，又譬如話啲巴士公司逆市取消優惠，而政府就一句「商業決定」，將責任推得一乾二淨。

呢嗱，就喺今年初，迪士尼樂園又宣布調高平日票價，而作為樂園大股東嘅政府，同樣翹起雙手。當時，有扮嘢文之稱嘅海洋公園主席盛智文義正辭嚴咁話，依家係香港嘅困難時刻，海洋公園唔會喺呢個時候加價，幾乎聽到太一叮熱淚盈眶。可惜轉過頭來，海洋公園加得仲勁過迪士尼。太一叮想問問盛智文：呢啲係咪叫食言呢？

叮！各大企業非常牟利，升斗市民非常悲慘。家陣金融海嘯為禍，豬流感又蔓延不止，大家想話出去遊埠散吓心呢，又驚一落機就畀人捉去隔離，想話喺香港本地遊呢，又遇着迪士尼同海洋公園加價，想話落樓下屋邨商場行吓呢，都發現啲嘢愈嚟愈貴噃。鬼咩，領匯逆市狂加租金，羊毛出自羊身上，啲嘢想唔貴都難啦！

如果你咁啱又係旅遊業者，咁你就係慘上加慘。旅發局早前公布五月份訪港旅客數字，比舊年同期下跌超過一成三，足足少咗二十幾萬旅客，如今迪園海園齊聲加價，又唔知趕走幾多旅客，打爛幾多業者飯碗。難怪尋日遊行人頭湧湧，十萬大軍浩浩蕩蕩，無他，工又無得返，街又去唔起，梗係谷到一肚火啦！

金融海嘯捲捲捲，經濟環境慘慘慘。唔該扮嘢文企定定，咪再扮嘢，太一叮要嚴正聲明，你個「加價列車」一啲都唔好玩，請你履行承諾，收番你個加價決定，否則，咪怪太一叮叮爆你個鎯鎯！