政府啱啱公布新一批授勳名單，但好多以前獲授勳嘅政界人士尋日喺一個酒會上晒行頭，爭住大晒「荷蘭水蓋」，醫管局主席「肥胡」胡定旭同立法會議員「IQ博士」黃宜弘分別喺心口掛上「金紫荊星章」，工程界議員何鍾泰亦騷身價晒銀紫荊星章。
煲呔曾喺酒會致辭時好似滾水淥腳咁，講唔夠兩分鐘就草草祝酒收場。肥胡晒完星章後，轉頭換番個馬會大董襟章趕入馬場負責監場，順便為愛駒「八逢九紫」打氣，但最後同三甲無緣，未能趁馬季煞科前拉番次頭馬。
同樣去完酒會入馬場嘅仲有全國政協委員盧文端，佢係新鮮出爐嘅「銀紫荊」得主，仲拖埋阿仔盧金榮為愛駒「福建王子」打氣，想話拉埋頭馬嚟個雙喜臨門啦，點知又係三甲不入，斷纜添！
