早前講過工聯會會長鄭耀棠一時講大咗，話請到禮賓府嘅人同四個局長首次參加尋日嘅巡遊，但實情特首辦同四個局長根本冇應承過棠哥，佢變相夾硬抬咗人上轎，結果特區高官全部出席完起步禮就拜拜，並冇巡遊。
棠哥初時仲唔肯認衰，話：「冇，冇，一直都話參加起步禮啫。」但作為公眾人物，公開講咗嘅嘢就覆水難收，佢當日講得好清楚，話禮賓府嘅人同埋發展局局長林鄭月娥、政制及內地事務局局長林瑞麟同勞工及福利局局長張建宗等會隨隊巡遊，包括「好似香港小姐咁繞場一周」，翌日多份報紙都有轉述，棠哥想篡改歷史，談何容易！
巡遊結束後，記者再追問點解唔見高官巡遊，棠哥呢次記性好好，指政府方面早喺兩日前已通知主辦單位，唔會參加巡遊；至於原因，佢叫記者問政府，總之強調高官肯嚟起步禮，主辦單位已經好滿足咁話。咁講即係間接承認有邀請高官參加巡遊一事啦，既然食咗檸檬咯，依家咪惟有跌咗落地，
番揸沙囉！