喺立法會議事廳內，政制及內地事務局局長「林公公」林瑞麟經常畀議員狂炳冇嘢做，仲話要摺埋佢個局同減佢一半人工，政府竟然仲頒個金紫荊星章畀佢，讚揚佢喺出任局長期間成績斐然，授勳消息一出令各界嘩然，人人大聲疾呼：「有冇搞錯！人肉錄音機都獲授勳？」
林公公尋日出席一個酒會時好似鸚鵡學舌咁，但好學唔學，竟然學佢老闆煲呔曾扮代表屈市民，話：「我今次獲頒金紫荊勳章，係各界支持下嘅成果，多謝政府同各界支持！」
各界支持？佢啲同事唔敢講啫，喺議事廳內肯定有部分議員唔認同，佢咁講簡直係「薑葱屈鯉」，夾硬屈人支持佢！