每年七．一遊行，就係搞事三人組出動之時，肥佬黎同李漢奸喺維園匯合出發，但兩人似交行貨多啲，李漢奸行到灣仔油站就停低吹水；肥佬黎隻身行到大有商場，亦頂唔順坐喺石壆打電話，原來急Call司機打救車佢走。佢就好啦，遊行當散心，攰就坐車走。

尋日遊行原定三點半出發，民主阿婆校啱時間喺三點零五分到達維園。同記者嗲一輪後，三點二十分走入遊行龍尾等出發，點知噩夢由此開始。佢一向自視甚高，以為泛民各黨都臣服其下，但昔日嘅泛民同路人尋日全部失晒蹤，只有一個唔再係立法會議員嘅單仲偕得閒陪佢一陣。

佢等到面燶燶，一度嘗試走外圍插隊，但唔成功，焗住喺烈日下暴曬粒半鐘先起步，

離隊前發老脾

仲記得○七年「撐一二普選」遊行，民主阿婆行行吓中途走去恤髮，畀市民鬧佢臨陣縮沙，尋日遊行途中就有市民喺人群中大叫：「忽然恤髮！」搞到佢塊面又黑多兩錢。

民主阿婆行到灣仔同金鐘交界就離隊，臨走前仲發老脾，話自己喺遊行隊尾等咗兩粒鐘，批評警方疏導人流不力。

民主阿婆事先張揚會嚟遊行，但最騎呢嘅係喺遊行開始前，白鴿黨主席「鐵頭仁」何俊仁同記者講，民主阿婆冇通知大家會嚟遊行，唔知佢嚟唔嚟喎。其實鐵頭仁點會唔知吖！民主阿婆成日騎劫泛民活動，今次搞成咁，睇嚟佢以後喺民主路上會更加孤單！