無啦啦有執達主任上門，話再唔交水費就要封屋收樓，係人都嚇餐死，有理冇理，即刻磅水先啦。不過，原來單嘢完全唔關自己事，係擺烏龍啫。邊個咁大整蠱？咪就係水務署囉。

呢嗱，有位姓孫嘅市民六月初畀幾個執達主任上門，追收旺角一間地舖欠交嘅三千六百幾蚊水費，對方仲話唔畀錢就封屋，屋企人惟有付款了事。查實，間舖早喺九年前已經賣咗畀人，不過孫生當時唔記得去水務署轉名，即係話佢根本唔係真正用戶。無情白事要幫人哋交水費，係人都谷到爆啦。

叮！水務署未查清楚欠款用戶係邊個就入稟索償，仲搵埋執達主任上原登記用戶住所追數，而且連商量嘅餘地都冇，收唔到錢就收樓，咁做法唔止官僚，仲極度擾民添，唔通官府真係惡晒？

照計，用戶幾個月唔交水費，水務署就應該截水啦，有乜理由一拖幾年，等個水錶繼續轉，水費係咁飆㗎。更何況，由截水到採取法律行動又拖咗好耐，佢哋有大把時間去土地註冊處查清楚舖位業權，邊個至係真正用水者。水費就識搏命追，查業權咁簡單嘅嘢就唔去做，查都唔查就亂咁告，你話係咪靠害吖。

水務署回應話，佢哋○四年轉用新服務系統，為免搞錯，拖咗幾年至截水。因為一直冇收到用戶對追收欠款信件嘅回應，惟有採取法律行動。

叮！水務署呢個新系統唔提猶自可，一提把幾火！使咗二億幾整色整水搞個系統出嚟，一開波就錯漏百出，淨係轉換地址就有八十一萬個客戶嘅資料搞錯；頭三個月發出嘅水費單，地址出錯嘅有六千張；因為轉咗電話，每日查詢電話超過一萬個，要嘥多八百萬公帑請臨時工幫手至搞掂。

新系統搞到一鑊泡，水務署照計應該吸取教訓，截水嗰陣加多兩錢肉緊，搞清楚用戶邊個打邊個至係㗎。依家連真正用戶係乜水都矇查查就入稟追數，誤將馮京當馬涼，仲搵人上門嗌封屋添，有冇離譜啲吖？

水務署月初至畀本報踢爆，轄下二十六間職員宿舍整體入住率話就話高達九成，其實係玩數字遊戲，嗰啲報稱「儲存物料」嘅單位，好多入面其實幾乎空無一物，攞嚟養蛇養蚊。水務署根本就係講大話，隱瞞浪費政府物業嘅事實。

叮佢個鎯鎯！水務署小題大做，幾千蚊水費欠款，未搞清楚責任誰屬，亂咁告人不特止，仲幾乎搞到要趕人瞓街；自己亂嘥政府資源就唔當一回事，請問署長馬利德，亂Fing公帑呢張「水費單」，水務署幾時找數先？