擁有五十年歷史嘅蘇屋邨，部分樓宇今年八月就會清拆，救世軍聯同一班街坊尋日搞咗個告別聚會，立法會旅遊界代表謝偉俊（Paul）都有現身，原來佢係舊街坊，講番細個嘅屋邨歲月，佢直認係反斗百厭星，試過玩到撼爆頭。
阿Paul係六十年代蘇屋邨開邨嘅首批居民，居於荷花樓，一直住到十七歲離開香港赴澳洲讀書。佢話，平時愛同鄰家小孩飛落樓梯，鬥飛得多梯級，仲試過激到玩走廊天花水管，當單槓咁玩，結果撼到頭破血流。
六、七十年代好多家庭都克勤克儉，阿Paul父母亦唔例外。佢媽咪每朝開保母車接送學生賺錢，下午就攞啲家庭手工返屋企賺外快，而父親最初在油站工作，後來先後轉職教車師傅及車行經紀，儲咗筆錢，八九年移民到美國定居至今。阿Paul話，父母都好想返蘇屋邨睇吓，惟父親行動不便，睇怕暫時好難實現嘞！