本文重點
恒基地產主席四叔李兆基一向樂善好施，家吓金融海嘯陰霾未散，佢尋日照向自己任名譽校董嘅北京大學豪捐兩億元人民幣做基建，為感謝四叔嘅捐助，北大人文學苑同埋公共教室樓將分別命名為「李兆基人文學苑」同埋「李兆基樓」。據講，李兆基人文學苑佔地面積近二萬五千平方米，工程預計二○一○年底完成。
多年來熱心教育
除咗支持北大基建外，四叔捐出嗰兩億元人仔仲會成立個「李兆基講座教授基金」，獲得基金資助嘅教授，就會叫做「李兆基講座教授」。
四叔多年來熱心教育，○七年分別大手筆捐出五億元同四億元畀港大同科大，去年又捐咗一億元畀上海復旦大學，仲分別獲頒授復旦大學名譽博士、北京清華大學名譽校董及戰略發展顧問、同埋北大名譽校董三大名銜。今年五月，四叔再捐四千萬元畀浸大嘅當代中國研究所做啟動基金。四叔做咁多善事，佢兩個孫女大個咗實聽教聽話啦！