台北市長郝龍斌日前訪港，佢嘅市長一職係接馬英九班，但估唔到原來佢哋嗜好都好相似，因為郝龍斌同馬英九一樣鍾意晨跑，尋日朝早仲專登由下榻嘅港島區酒店，走到去尖沙咀星光大道跑步，可惜撞正呢幾日打風兼落大雨，郝龍斌冇辦法一展身手。
郝龍斌訪港兩日，雖然先後同港府兩個高層會面，但口講好重視港台關係嘅港府高官，卻頻頻畀檸檬佢食，譬如前日佢同煲呔曾見面，一心請煲呔訪台，點知被對方婉拒。政務司司長唐英年尋日請郝龍斌午宴，席間雙方傾到簡化兩地民眾入境，郝開到聲希望台灣旅客來港免簽證，但港府高官依然以研究研究搪塞過去。
連番食檸檬下，郝龍斌仍然好大方，大讚香港比起上次佢○五年到訪時，城市建設同管理有好大進步，例如使八達通嘅經驗值得借鏡。