陳太尋日喺港台節目再次開腔，炮轟煲呔曾獨攬大權同為所欲為，施政予人官商勾結同私相授受感覺。講到多個公務員同紀律部隊團體不滿薪酬檢討，聲言上街抗爭，做過公務員之首嘅佢就講到自己好心噏，仲話講到尾都係因為政府做嘢人治冇規矩。

佢講得好激昂，但班青年政壇新秀問啲有關佢嘅尖銳問題時，陳太嘅辯才即刻消失晒。譬如人哋問點解泛民只係識得批評、反對同搞破壞？佢就避開唔答。咁佢喺回歸前同回歸後初期都做過政府第二把交椅，點解當時唔爭民主，退咗休先識得出聲？陳太更好似借咗聾耳陳隻耳咁，索性當聽唔到。「民主阿婆」咁叻閃避，政壇新秀要學嘢啦。

認老唔敢爭做特首

尋日嘅話題都講到年齡，大家都知道，一度野心勃勃嘅陳太想爭奪特首寶座，但阿爺始終唔信佢。尋日有個年輕人問佢二○一二年仲會唔會選特首？陳太終於肯認老，佢話做特首要有好多精神同心力，佢年事已高，應該留番啲機會畀啲後生仔。梗係喇，連幾個名不經傳嘅青年人嘅問題都答唔到，想唔認老都唔得喇！而且特首嘅嘢真係同佢無關噃。

講到尾，面對金融海嘯同豬流感打擊，大部分市民依家最渴望嘅都係醫飽個肚同搵份好工，其次就係啲高官同政客爭氣，唔好愈幫愈忙，乜嘢政制改革民主普選，遲啲再講都未遲，因此，無論陳太點樣瞓身硬銷都係嘥氣，「民主阿婆」都係慳番啖氣返屋企湊孫算囉。