近日多個領匯停車場更換服務合約,更換承辦商後,各停車場大幅削減人手,喺呢個時候,當然會有工會介入為打工仔爭權益,亦係工會間角力嘅戰場。
工聯會作為香港最老牌嘅工會,但喺多次工潮都畀人截胡,都皆因太老定,而喺紮鐵工潮一役,仲畀職工盟騎劫添,事後工聯會痛定思痛,調整策略,呢排狀態甚勇,但喺領匯呢單嘢,又畀職工盟搶先做咗場騷。
唔通又再故態復萌?咁都要補飛㗎!但今個立法年度就嚟結束,議程都排好晒,但工聯會嘅立法會議員KK黃國健就趕搭尾班車,趁住立法會七月八日最後一次大會提休會辯論,聲討領匯喺呢個失業高企嘅時候,仲持續加租同埋削減停車場保安員。
KK將事件提升到立法會嘅層面,好明顯係想吸引更多社會關注,同畀壓力領匯,起碼比對家柴娃娃喺街邊嗌更高層次,贏番一仗,睇怕係想蝕頭賺尾嘞!但係佢有冇諗到,無論動議辯論或休會辯論都係無法律約束力,領匯根本唔會聽你支笛。