27/06/2009

播放本新聞相關短片

政情:包陪慶上海籌建一條龍校

已故船王包玉剛嘅長女Anna包陪慶自幼熱愛舞蹈,多年前喺西環開設一間私人跳舞室,吸引咗唔少城中名媛闊太幫襯,作為舞林高手嘅Anna當然都跳埋一份啦,但最近佢停咗跳舞,並非工作忙到冇時間跳,而係佢話近期因為雙腳有啲毛病,所以逼住要暫停,相信要休息一排先至可以重出江湖。

其實,Anna對兒童教育更加全情投入,由佢策劃嘅上海包玉剛實驗學校喺舊年九月開學,而日前佢以校董會前主席身份出席演藝學院畢業禮時透露,佢近期又忙於喺上海籌建學校,提供幼稚園至中學一條龍升學,預期將更加繁忙。包玉剛實驗學校係佢第二個仔,遲啲再有新校落成,豈不是又多個仔?