尋日政府公布由港大校長資深顧問程介明，取代喺微調方案爭拗中同當局頂到行嘅田北辰，出任語文教育及研究常務委員會主席，七月一日生效，任期兩年。程介明今年六十五歲，比阿田大六歲，雖然程介明喺教育界江湖地位高，回歸後入教統會，成為推動教改嘅重要力量，但近年轉趨低調，今次突然出掌語常會，政府冇人可用嘅窘境，大概反映一二。

阿田坐喺語常會八年，畀人換走唔覺奇怪，但佢話以前有公職將停，官員都會好畀面，會事先同佢通聲氣，講句「多謝」，大家心中有數，好似早前再培訓局主席卸任，勞工及福利局局長張建宗就好識做，但今次教育局局長孫明揚就連一個電話、講句多謝都冇。

佢批評政府視野愈嚟愈窄，但表明離開語常會一樣就教育或其他議題不平則鳴。