27/06/2009

播放本新聞相關短片

政情:方剛叫加班畀員工埋怨

立法會批發及零售界代表方剛家族旗下嘅時裝集團Toppy,呢個星期二向所有店舖嘅前線員工發出通告,要求前線員工由星期三起開始加班,由原本返十個鐘變為返十二個鐘,仲要返到下個月尾,引起部分員工不滿,向本報投訴。

投訴嘅員工話集團張貼通告冇得畀員工揀做定唔做,又冇講明之後會唔會變番十個鐘,搞到前線員工好不滿,話員工就算返多兩粒鐘,戙喺舖頭都做唔到幾多生意,反而搞到啲員工體力透支,有人仲埋怨早前新年已試過咁做,開頭話加班一個月,結果加咗三個月,有錢都補唔番!

方剛同我哋講,為配合舖頭減價,集團確實有要求員工加班,但畀足補水,仲話如果有員工返十二個鐘頂唔順,可以同人事部講,咁就唔使佢加班,公司會請Part-Time頂替喎。

佢好無奈話,經濟唔好諗住大家可以加班賺多啲,既然有人唔想賺咪算囉。佢仲話做咗立法會議員後,成日都收到好多匿名投訴,以為佢做咗議員就怕咗,佢強調自己用正常嘅營運手法做生意,畀足錢就唔會怕!