立法會經濟發展事務委員會下星期二開會，其中一項議程，有時間、冇內容，好多議員尋日喺內務委員會齊齊發難，先向立法會秘書長吳文華投訴，冇議程嘅議程，到底算唔算議程？其實，星期二有行政會議，外界早就估到，政府上立法會公布迪士尼擴建計劃，只係行會議程保密，政府先至投鼠忌器，欲言又止。吳文華解釋，以前政府突然上立法會公布重要事項，令議員不滿，所以依家咪約時間囉。

於是啲議員將炮口指向委員會主席林健鋒，質問知唔知議程內容。林健鋒話同政府溝通過，但當局講明要保密，所以唔講得。

此話一出，議員群起反對，左中右陣營一齊起哄，批評政府唔尊重議員，署理內會主席李華明表明下星期一要向唐唐投訴，專業會議何鍾泰鬧政府無意改善行政立法關係，大家七嘴八舌，嘈足一粒鐘。議員投訴起上嚟，真係麻煩過市民！

蘇菲幫盟友出頭

林健鋒畀同僚投訴，盟友「蘇菲」梁劉柔芬散會後亦出嚟，投訴議員投訴林健鋒係打橫嚟嘅表現，指林健鋒跟足議會程序，根本冇錯，投訴議員投訴錯人。

咁蘇菲又錯唔晒喎，若果當日保密嘅議程當真係迪士尼嘅話，負責呢瓣嘅就係商務及經濟發展局，咁林健鋒口中話當局講明要保密，咁呢個局嘅揸FIT人係邊個？咪係局長Rita劉吳惠蘭囉，亦即係話Rita叫林健鋒唔准講。換言之，Rita閃閃縮縮，累林健鋒硬食同僚嘅波餅。