依家連食物銀行都擔心唔夠派，有見及此，中華總商會發起愛心行動，尋日宣布送出七萬張、總值二百一十萬銀嘅「溫暖美食券」，經由社署派發畀有需要嘅低收入家庭，憑券喺七月一日起去指定嘅快餐店可以免費換碗熱飯同飲品，等貧苦大眾開心吓。
會長蔡冠深話最初構思係想搞食物銀行，但計過數行政費太貴，靈機一觸拉埋飲食界合作。喺金融海嘯下做善事，佢話「撲水」最艱難，自己捐出三十萬元外，亦揼咗老友「褲王」楊釗同金利來太子爺曾智明心口，各捐三十萬元，夾埋其他商家在內，合共籌到三百二十萬元。
除「派飯」外，亦計劃定期撥出十萬元畀社署成立一個緊急援助基金，協助遭遇重大事故嘅悲慘家庭，首批五萬元善款已發放畀紅磡庇護工場鐵閘壓死女工嘅家人嘞！