作為立法會旅遊界代表嘅阿Paul謝偉俊，早幾日參加咗香港華商協會舉辦嘅二日一夜考察團，去澳門同中山考察。雖然今次名義上係半件公事，但難得可以忙裏偷閒，阿Paul就拉埋白姐姐陪佢去。
考察團仲參觀咗中山荔枝園，一班團友仲可以即摘即食添！當日陽光普照，阿Paul一身奪寶奇兵Look，同白姐姐戴埋同款嘅情侶帽，仲好體貼咁幫白姐姐拉低啲荔枝，等佢摘得冇咁辛苦。
除咗摘畀白姐姐食之外，阿Paul仲另外摘咗幾斤返港，專登帶畀立法會嘅同僚同議員助理食添，兩三箱荔枝話咁快就掃晒，荔枝好唔好食就冇人知啦，但阿Paul專登摘畀白姐姐食嘅就一定甜到漏啦！
