波波日前話睇唔通嚟緊大市點走，最近已將手上嘅過半數大笨象股份沽出，實行「有懷疑、揸現金」，但早前以四十七蚊入咗大批大笨象股份、計埋供股權賺咗成個開嘅陳健波，最近亦減持部分股票投資，但唔包括大笨象，佢堅持大笨象喺兩三年內可升破一百蚊，重新變「紅底股」，如果大笨象再跌多兩嘢，佢會再出手增持！

暫時冇再沾手股市啫，但唔代表波波停晒手唔投資，近月佢轉咗炒外匯，喺十一蚊附近買入大批英鎊，仲講明今次出手唔係為賺錢。

波波嘅囝囝喺牛津大學讀緊法律系一年班，淨係學費已經成二十萬港元一年，加上每年十二萬幾嘅生活費，如果唔趁低吸納番多啲英鎊，一旦匯價急升就會好大鑊，所以入定啲英鎊純粹為囝囝買個保險喎！