其中「大舊」陳偉業乘機發難，批評政府過去禁止台灣當局官員同相關人士入境，係對佢哋嘅極大侮辱，所以對特區政府官員前倨後恭嘅表現感到極度失望並作出強烈譴責。

好明顯大舊係玩針對，插早前去台灣訪問嘅政制及內地事務局局長「林公公」林瑞麟，但同搵商機完全無關，擺明係乘機抽水，但更離譜嘅仲有。

白鴿黨嘅「肥仔明」李華明竟然加上與內地部門商討，恢復被禁止進入內地嘅香港居民同立法會議員嘅回鄉權，向佢哋發出《港澳居民來往內地通行證》。睇到呢度，相信唔使多講，大家都知肥仔明係為自己友爭番張回鄉卡，但同原動議案完全係兩回事，要攞回鄉卡關台灣乜嘢事，咁仲唔係博大霧、撈油水咩！

至於ＩＱ博士動議嘅吸引國際金融人才，泛民都唔放過撈油水嘅機會，白鴿黨嘅涂謹申，仲拉埋雷曼迷債、精明債券同中信泰富事件落水，分明係轉移視線，再鬧多政府、金管局同銀行一次。

雷曼委員醞釀退會潮

班議員到時點借題發揮，好快就睇得到，但講開雷曼，立法會雷曼小組委員會多名委員早前被踢爆成日蛇王唔開會嘅，據聞部分被點名批評嘅委員私下大呻冇癮，一來不滿啲會議又多又長，討論又唔夠聚焦，嘥時間兼冇意義；二來部分人最初係唔想加入，只係畀面政府先勉為其難幫手，依家反而畀人質疑佢哋偷懶蛇王，心裏滿不是味意，醞釀乾脆唔玩退出小組。但銀行界一收到呢個消息，立即出招游說啲議員留低，最終成功阻截呢次退會潮。