消委會今年頭五個月接獲投訴一萬五千幾宗，比舊年同期急升一成，其中服務性行業嘅投訴超過七成，主要涉及金融產品、電訊同美容服務呢幾個行業。消委會話，由於經濟不景，有公司改用不良銷售手法損害消費者利益，希望政府快啲立法禁止有關行為。

嗱嗱嗱，早排有個啱啱中五畢業嘅女仔，諗住快快趣趣搵份工，點知畀人落疊加入直銷公司，一日內向三間財務公司借咗十一萬去交會員費同入貨，收唔到佣金至發現中招。因為冇錢還債，妹妹仔焗住申請破產，同時報警求助。

叮！一個十九歲女仔，錢都未搵到就要申請破產，真係聽都未聽過。呢個好明顯係傳銷陷阱啦。呢嗱，舊年就試過有幾百個市民報警，話曾經參與層壓式推銷畀人呃咗巨額金錢。所以話，政府唔做嘢，受害人陸續有來。

上個禮拜，又有市民投訴多間旅遊會籍公司貨不對辦，有百幾人被硬銷購買會籍，涉及金額超過四百幾萬。受害人入面有六成六年齡仲未到二十四歲。消委會投訴數字顯示，今年頭五個月已有七十三宗相關投訴，比舊年同期升咗兩成二，預計暑假嗰陣數字仲會上升。

早喺上世紀八十年代，本港話就話制訂咗法例，規定任何人明知而推廣層壓式推銷計劃，可處罰款十萬元及監禁三年。但係法例漏洞多多，有姿勢冇實際，近年仍有唔少人走法律罅，利用長者、家庭主婦同後生仔女搵快錢嘅心理，不斷轉換經營手法賺黑心錢。

叮！其實不良銷售手法，又點止層壓式銷售一種吖。呢幾年各種騙案花樣百出，苦主申訴不斷，但當局有漏洞唔去堵塞，執法又鬆，放任縱容，唔幫受害人出頭不特止，淨係識推卸責任。

好似令幾萬港人血本無歸嘅雷曼迷債咁，財政司司長曾俊華、財經事務及庫務局局長陳家強同金管局總裁任志剛呢班財金高官，事件爆煲之後一味顧住互相扯貓尾。雷曼苦主仲未攞番個公道，又爆多單「精明債券」驚魂，講乜鬼「有效監管」吖，咪得個噏字。

消費投訴近年一直上升，消委會舊年接咗四萬二千單投訴，破晒紀錄，涉及金融服務嘅更激增超過十倍。不良銷售手法層出不窮，騙徒老千橫行無忌，電子產品投訴多，食物飲料有假貨，銀行都話信唔過。呢啲嘢政府唔知？呃鬼咩！唔敢管、唔想管就真。鑊鑊都要等到爆煲，市民至發現原來根本就係無王管，咁嘅政府仲邊有人信吖。

叮佢個鎯鎯！次次市民要求加強監管，當局都攞「大市場、小政府」做擋箭牌，繼續「唔知、唔睬、唔理」。再係咁落去，「購物天堂」遲早變「宰客天堂」！