正生書院遷校梅窩遭當地居民反對後，多個政黨都介入事件，富貴黨主席劉健儀（Miriam）尋日就率領十幾名黨員同工作人員，喺銅鑼灣街頭舉行心意卡簽署行動。正生嘅風波攘擾咁耐，富貴黨家吓先搞簽名行動，會唔會太遲呢？Miriam不以為然咁話，立法會嚟緊禮拜三先休會辯論，佢哋尋日搞簽名行動，今日就可以拎入芝麻灣送畀正生書院嘅學生，點會遲呢？
街頭嗌咪 唔怕熱浪
尋日氣溫高達三十幾度，又焗又曬，Miriam同一班黨友下晝三點鐘喺銅鑼灣開檔，真係熱浪逼人來，Miriam唔理咁多，喺街頭嗌咪，呼籲路過嘅市民簽名支持，為正生書院嘅同學打吓氣。周末嘅銅鑼灣街頭人來人往，現場所見，佢哋收集簽名嘅活動都幾成功，難怪Miriam話將會收集到三千五百個市民簽名畀正生嘅學生啦。
正生書院遷校件事廣受關注，據講連今日舉行嘅《城市論壇》節目都搬入去芝麻灣舉行。Miriam認為，日前有政黨入芝麻灣探望學生，可以話係直接支持學生，而佢哋發動市民簽名支持就係間接支持，大家都對正生嘅學生好有心。