減薪係大趨勢，高級公務員減薪之後，作為公職人員嘅立法會議員都有壓力，我哋事先問吓啲議員嘅睇法，點知啲議員嗌高官減薪就人人狠勁十足，唔係減一成就係減夠兩成半，輪到佢哋自己，就搬出機制嚟行事。公文袋嘅余若薇更加話，議員薪酬得嗰六萬幾蚊，未達需要減薪嘅高層公務員水平喎。唔係呀嘛？高級公務員嘅薪酬係四萬八千幾蚊以上咋喎！
議員月入六萬五千二百六十蚊，兼有兩萬五千蚊醫療津貼、四十七萬銀任滿酬金，點睇都屬於高級公務員以上嘅收入啦，咁議員點睇減薪呢？專業會議嘅何鍾泰、建仔嘅陳鑑林、經濟動力嘅林健鋒、職工盟嘅李卓人同勞聯嘅李鳳英，全部都話跟機制行事，白鴿黨主席何俊仁尋日更叫大家做嘢唔好為一時即興贏掌聲。
本身係上市公司主席嘅「IT豪」譚偉豪（圖），就心清數熟得多，尋日好快噏得出，跟高層公務員減薪百分之五點三八，議員都係減三千幾蚊人工啫，言下之意，對佢嚟講濕濕碎。不過，講到減一成，佢又話：「減咁多會畀人唾棄喎！」