袋巾傑嘅大狀黨友余若薇尋日話，其實好多時議員都會帶電腦入會議廳同外界聯繫，而Facebook亦係同選民溝通嘅方式，佢仲話：「嗰位（袋巾傑）畀人影到又唔係咁方便嘅！」唔通記者影唔到，議員就可以喺議事廳慢慢同妙齡少女選民溝通？

嚴人寬己雙重標準

白鴿黨主席何俊仁更撐到出面，話開會咁長時間，議員行出行入或上網都無可厚非。對於袋巾傑笑笑口咁同隔籬位同僚分享低胸妙齡少女網頁，何俊仁就反問：「你又點知佢哋講緊呢樣嘢呢？未必係講緊個女仔低胸呢！」記得泛民當年大鬧李國章打機，家吓竟然變晒另一套標準，呢啲到底係嚴人寬己，定係罪不上自己友呢？

講開公文袋，做開執委嘅前立法會議員張超雄搞咗個叫「正言匯社」嘅組織，佢都認同退黨嘅譚香文認為公文袋精英心態嚴重，仲話公文袋冇社區樁腳，做地區工作較困難。