阿魚人不如其名，冇乜優游自在嘅命，做官多年，瓣瓣棘手嘢都上晒身，例如賭波、博彩稅、種族歧視、跨區交通津貼、兒童發展基金、社會企業等，份人工搣出嚟有血有汗，點知最後都要用原本嘅職級退休。

辛苦咗咁耐，佢打算退休後先同家人去旅行歎吓輕鬆吓，初步揀咗東南亞國家。立法會議員劉慧卿日前同佢食飯時就事先警告，話對上一次餞別嘅官員就係前房屋及規劃地政局常秘梁展文，所以今次面對阿魚，一定要佢退休後唔好做一啲令公眾憤怒、尷尬同有利益衝突嘅事情喎。