行政會議日前通過公務員薪酬調整方案，警察評議會當日已表示不能接受，CY同張炳良尋日出席同一場合時就充當和事老。行會通過嘅政策向由政府相關政策局去解釋、推行，今次減薪風波搞到要兩個行會成員親自操刀，真係少見。

CY話，希望紀律部隊，特別係警務人員能顧及整體社會的和諧穩定，言下之意就係，佢哋上街嘅行動不利於社會穩定；張炳良跟住上場講得更加直接，佢話政府並唔係用鐵板一塊嘅方式處理紀律部隊嘅薪酬問題，而係因應社會、經濟同公務員士氣等因素嚟決定公僕薪酬。佢嘅潛台詞即係，政府已經考慮多方面因素，紀律部隊團體唔應該片面指摘政府。

輸打贏要心態惹反感

佢哋親身上陣都係想為連續兩個禮拜日嘅遊行降溫，事關政府係糾紛嘅資方，出聲只會激化矛盾，或者係咁，咪搵啲行會成員充當調解員囉！

事實上，好多市民對相關團體發起遊行都有異議，咁多年嚟，公務員加薪就順風順水、一團和氣，但如果係減薪就次次扭盡六壬，唔係管職雙方談判破裂，就係打連場官司，公務員何止係鐵飯碗咁簡單呢？呢種「加得唔減得」嘅輸打贏要心態已經引起好多納稅人反感，睇吓網上意見就知啦，處理得唔好，就會形成另一波公僕同民間團體對壘，社會怨氣更大，政府真係要諗計斡旋。