呢嗱，當局本來將學校講到係好危險嘅地方，好易集體中招咁。但係打工仔個個搵朝唔得晚，父母邊度得閒留喺屋企照顧仔女吖？如果將細路獨留家中，又被人告疏忽照顧要拉要鎖，於是停課令一下之後，有家長索性帶細路仔返學校就算。

點知依家留喺停課嘅學校可能仲安全，課室得番小貓三四隻分開坐，唔單止有專人久唔久定期清潔消毒，教職員仲個個戴晒口罩，又會定時定候排隊去洗吓手仔，都不知幾咁衞生安全！計太一叮話齋，依家係掉番轉頭，反而「最安全嘅地方就係最危險」就真！

照計成班高官成日做清潔騷，政府設施應該身先士卒搞好防疫衞生，一定係至安全嘅地方至係㗎。原來啱啱相反，有家長帶個仔去兒童圖書館，發覺裏面人頭湧湧，逼滿停課嘅小學生。

本報記者喺停課首日去南葵涌兒童圖書館睇過，裏面得嗰六部電腦，根本唔夠分，見到好多細路堆埋一齊玩電腦，你又撳吓個鍵盤，佢又Click吓個滑鼠，玩完吓頭，摸摸面。圖書館話就話會定期清潔，但記者觀察咗足足兩個鐘咁耐，都唔見有人幫鍵盤、滑鼠清潔消毒，污糟邋遢冇人管。

叮！兒童圖書館衞生已經夠晒差，原來成間圖書館嘅防疫工作都好鬼兒戲。雖然喺入口處有提供口罩以及消毒液，之但係冇個職員戴口罩，唔好彩是但一個有事，容乜易將細菌病毒傳埋畀其他人。

其實除咗兒童圖書館之外，好多小學生都去兒童遊戲機中心玩，記者去過兒童場睇過，場地細細，逼咗成百個細路仔。佢哋打打吓機，一時會咬吓手指，有時就挖吓鼻，有個細路仲一路打機一路攞住隻雞翼猛咁食，隨時禍從口入，食埋豬流感病毒落肚都有之。

叮佢個鎯鎯，喺呢次豬流感疫情中，當局做嘢一時一樣。疫情啱啱爆發嗰時唔當係一回事，遲遲冇緊急應變措施，好嘞，當有一間學校出事，又忽然懶緊張做過龍。

有學者指出，從傳染病角度嚟睇，只係出現確診嘅學校停課就已經好足夠，到陸續有學校爆發先至考慮全港停課。你話嘞，呢個停課決定唔係政治決定係乜吖？

最弊係成班高官做親嘢都甩甩漏漏，停課還停課，使唔使決定得咁倉卒呀？畀多啲時間等學校以及家長準備吓都得啩。仲有呀，明知停課期間兒童圖書館實會逼爆，竟然又冇採取相應配套措施。靠政府打呢場抗疫大戰喎，不如自求多福好過。

講到呢度，都冇提到要叮邊個，但係心水清嘅讀者都知，仲有邊個懶得過又廢得過佢吖？食物及衞生局局長周一嶽，抵叮到極！