新界問題一向複雜，唔係非黑即白咁簡單，早前錦綉大道使用權問題，經「新界王」、鄉議局主席劉皇發從中斡旋，終於成功擺平事件，總算為佢入行會立威，但今次正生書院嘅情況就好棘手，政府又想擺發叔出嚟充當和事老，但鄉議局突然煞車，取消討論正生書院遷入梅窩，即係話發叔拒絕政府嘅要求嘞！
據了解，發叔覺得依家梅窩居民心中把火燒到㷫合合，正生書院師生嘅心情亦難以平復，風頭火勢，呢個絕對唔係做架樑嘅時間，會吃力不討好，萬一有乜閃失，發叔更加無辜捲入是非爭端，呢條數點計都唔划算，佢寧願等雙方冷靜落嚟，傾出個脈絡出嚟先介入，到時就算要佢召開鄉議局特別大會，都唔成問題。
呢次處理正生書院風波，發叔簡直係夾心人，皆因佢係鄉議局主席，梗係要代表鄉民利益，但佢同時又係行會成員，政府要將正生書院遷入梅窩，佢係咪可以唔撐政府？點拆呢個局，就要睇吓佢老人家嘅功力嘞！