呢排白車死火頻生，喺席間亦有記者提及救傷隊都有救護車，情況又點呢？有高層話依家有十架車，七年車齡就要換，換車前一年就會部署，所以依家啲車平均車齡兩至三年，十架之中有兩架係新車，其餘最舊嗰架只係五年，所以好少死火喎！

嗰位高層仲好老實咁話，啲車一來出勤率唔夠白車咁高，二來係搵番原廠維修，而換車都要睇餸食飯，咁當然係募捐善款有幾多啦。

聽完之後，真係覺得聖約翰救傷會間接摑咗政府一巴。點解？政府必定知道白車出勤率好高，但要十年車齡先換，仲可以翻新再用，到頻頻死火畀人鬧爆嘞，先話訂新車，但新車配套齊晒都係兩年後嘅事。

政府換白車唔使揼人心口，但竟然仲歎慢板，咁你話政府係咪冇危機意識吖！