比賽食材由大會預定，有豬肉、西芹、紅蘿蔔同粟米，克勤仔揸起鑊鏟，始終唔及平時揸咪嗌口號咁自然，但處理食材方面就好熟手，識得用少少鹽、豉油同油蘸到豬肉入味，先至落鑊，而且落料分量都幾準繩，佢起火開鑊前後判若兩人，肯定有景轟。

事後佢自爆全靠「廚神女友」。原來佢女友讀書時家政課攞高分，咁近城隍廟，比賽前夕就叫女友嚟惡補廚藝，仲預習過一次，所以咪咁熟手囉。