立法會會計界議員「波波」陳茂波早前自爆喺高位買落唔少大笨象股份，一度變咗大閘蟹，好彩佢其後喺低位撈番多少貨，加埋供股折讓同今次升浪，整體嚟講總算可以打個和。

佢尋日都話最近股市係咁升，但實體經濟就繼續走下坡，令佢睇唔通嚟緊大市會點走，加上做咗議員後公務繁多，唔得閒日日住個市，喺「有懷疑、揸現金」嘅原則之下，佢最近沽出手頭上超過一半大笨象股份套現，等大市前景清晰啲之後再重新入市搏殺！但佢強調投資決定係好個人嘅嘢，如果有人跟佢沽貨而最後賺少咗，千祈唔好搵佢算帳。