廠商會尋日搞咗個飯局，會長尹德勝向傳媒簡介搞個「工展芳華薈」，歷屆嘅工展小姐或參選過嘅佳麗都可以參加，集結力量去做慈善活動。突然話鋒一轉，開始聞到有啲火羅味，尹會長反駁日前《明報》有報道話工展會參展費嚟緊將逆市加價百分之九，有牟取暴利之嫌嘅報道。

尹會長承認有加租，但只係百分之四點幾，因展期長咗一日，水電同保安都要畀多啲，而攤檔租金頂多一日一千蚊，比起貿發局三至五日展期要成萬蚊，已經平好多。

成立儲備基金做善事

佢仲大反擊，話廠商會謀取暴利係不符事實，一毫子都冇落過啲會董袋中，又話工展會係畀啲參展商用嚟推廣品牌，唔係畀佢哋嚟賺足一年嘅錢，就算廠商會賺到錢，啲錢都用嚟發展會務同做慈善，稍後仲會成立儲備基金，將啲收益入晒落去，攞嚟做善事。

嘩！咁動氣大平反，睇嚟佢真係谷到爆喎！老實講，喺佢領導呢幾年，廠商會做咗好多改革，議會嘅代表亦年輕化，但距離佢落莊仲有幾個月，搞單咁嘅嘢，容乜易臨尾搞衰個朵㗎？佢擺明係呼冤，一句講晒「咪砌我生豬肉」。

飯局臨尾，佢仲講咗個故事，話春秋戰國，齊國孟嘗君門下食客三千，當中有個叫馮驩嘅食客好奄尖，又嫌冇馬車接，又嫌冇魚食，但孟嘗君一一遷就，其中一次搵馮驩去收數，點知收數不成，仲燒埋啲單，激到佢彈起。

其後，當孟嘗君失勢，告老歸田，就只剩馮驩陪佢返鄉，點知踏入村門，鄉民夾道歡迎，原來馮驩當日走嗰條數就係班鄉親嘅。

究竟尹會長係咪自比孟嘗君？咁並唔緊要，最重要係佢想話畀啲參展商聽，賺到錢都要回饋社會，而廠商會嫌做得唔夠多，好多貧窮家庭仲等住佢哋幫。