咦，唔係已經裝咗天眼嘅咩？點解仲捉唔到疑兇嘅？鬼咩，原來啲天眼有「先天性白內障」，好多地方根本睇唔到。警方尋日終於認低威，承認最近一宗鏹水彈案發生嗰陣，天眼拍攝唔到過程。佢哋鎖定為犯案地點嘅兩幢大廈天台，正正係天眼嘅盲點。

天眼形同虛設，本報記者實地考察，日前到旺角行人專用區每幢大廈逐一調查，發現警方嘅監測安排至少有「四大漏洞」。天眼變咗「天冇眼」，唔怪得警方到依家仲矇查查，拉唔到鏹水彈狂徒啦。

呢嗱，豉油街有幢警方嘅「目標」大廈，前後分別背向裝咗天眼嘅兩幢商業大廈，天眼根本睇唔到。警方又冇喺附近設置人肉監測點，記者揸住樽礦泉水伸出窗口，五分鐘都冇人理。如果不法之徒想犯案，掟完鏹水彈再施施然落樓走人都唔使驚啦。

至弊附近好多樓宇嘅天台都畀旁邊嘅高樓或者僭建物擋住，天眼根本發揮唔到作用。喺天台掟個鏹水彈落去話咁易，使乜驚畀人見到吖？

天眼有盲點，警方冇理由唔知，唔係使乜設立「人肉監測點」吖。點知有啲監測點居然喺中午出現真空。嗰陣啱啱好係午飯時間，下面人來人往，再飛個鏹水彈落嚟，閒閒地灼傷幾十人，咁就大劑咯。狂徒冇午休，隨時會出現，警方咁樣監測法，等於攞個穿窿網去捉魚，乜都走晒啦。

仲有呀，既然天眼有盲點，要靠「人肉監測點」補不足，照計居高臨下至正路吖，點知有啲監測點居然仲低過附近樓宇，畀人一眼望晒。唉，都唔知警方到底想監測犯案狂徒吖，定係想畀對方監視，真係得啖笑。

叮！政府大拿拿使一百七十萬裝咗個閉路電視監測系統，又咁大陣仗設立「人肉監測點」，居然甩甩漏漏，完全係自欺欺人。依家捉唔到狂徒，惟有繼續「呼籲市民提供資料」，乜架都丟晒啦。

有油尖旺區區議員批評天眼得物無所用，高危嘅地方覆蓋唔到，政府只係做場大龍鳳呃市民，完全係「浪費警力」。仲有吖，附近好多舊樓，唔係冇保安就係冇閉路電視，不法之徒可以掂行掂過，加上警方監控盲點多多，上咗樓做乜都得啦。再係咁，咪話三個鏹水彈，多多都有吖。

叮佢個鎯鎯！鏹水彈半年內三襲旺角，狂徒明剃警方眼眉；「白內障」天眼裝咗等於冇裝，當局自剃眼眉。唔該政府咪再顧住做戲，快快脆脆做番啲實際嘢，將兇徒緝拿歸案。唔係嘅話，眼眉毛遲早被剃晒！