環境局局長邱騰華早排去完日本試電動車，常任秘書長王倩儀尋日去深圳參與「2009綠色行動日暨深港清潔能源汽車推廣應用活動」，講明要同深圳政府一齊開始試用比亞迪架雙模混合動能車F3DM，仲身先士卒坐上部國產電動車兜咗陣風，試完後大讚運行好暢順，仲好似拎手信咁，帶咗兩部車返港。
下個月開始，環境局、環保署、機電工程署、運輸署、海關同漁護署等會輪流試用呢兩部國產電動車，收集到嘅資料就攞嚟同深圳方面交流吓。
呢架國產電動車售價十五萬元人民幣，平過日本出產嘅環保車一大截，製造商仲話可以用家用電源叉電。係咪物有所值？咁就要測試過先知嘞！
