13/06/2009

播放本新聞相關短片

政情:林健鋒盛事基金揸弗

立法會議員林健鋒、梁劉柔芬同梁君彥嘅聯合新竇口,喺本月二十六號掛牌叫做「經濟動力」,而最新消息話佢哋打算提早喺十六號搞開張酒會,睇嚟真係好心急要擺脫3L呢個名喎!咁啱政府尋日宣布,委任林健鋒做盛事基金評審委員會主席,由本月十五號生效,為期三年,佢都算雙喜臨門囉。

預算案預留一億元設立盛事基金,推動香港成為「亞洲盛事之都」,基金新鮮出爐,林健鋒變做開荒牛,角色同佢有份創立嘅「經濟動力」好相似。

佢嘅盟友、工總喺立法會嘅代表梁君彥,公職亦有變動。政府尋日宣布委任工總主席陳鎮仁接替梁君彥,下月起執掌生產力促進局。新主席又嚟自工總,怕唔怕被人話世襲㗎?佢話政府揀人係睇能力嘅,陳鎮仁為中小企做咗好多嘢,有咁嘅接班人,佢都好開心喎!