本文重點
日前發生菲傭斬殺女僱主嘅兇案，真係好恐怖。尋日喺一個活動度見到婦女事務委員會主席高靜芝，問起有冇外傭煩惱，佢話同家中外傭都不知幾和諧，幾年前仲有菲傭團體頒咗個好僱主獎畀佢添，而提名佢嘅正係家中嘅菲傭。
將心比己 夠晒長情
高主席同菲傭嘅相處之道就係將心比己，而且仲夠晒長情添。佢話之前請嘅菲傭做咗二十年，由佢湊大個女，所以菲傭退咗休後，每年都請佢返嚟小敍奉為上賓，依家屋企嗰兩個菲傭都分別做咗十二年同八年喇。
佢揀菲傭仲自有一番心得，最重要係善良，有啲人鍾意揀啲後生靚女，但佢偏偏揀醜嘅，仲要愈醜愈好，年紀最好就係四十至五十歲。嘩！乜佢揀埋啲醜中女㗎？當然有原因啦，佢話年紀大啲會定性啲，冇後生女咁心野四圍wet喎！
善良又點樣辨別呢？博請嘅梗係扮晒嘢㗎啦！高主席話最好揀啲菲傭係有宗教信仰嘅，事關有信仰嘅人唔會差得去邊喎！