豬流感（H1N1甲型流感）疫情擴散，牽動全城神經，喺高官眼中，嚟緊幾個月政府可唔可以短暫擺脫苦日子，可以話成也抗疫，敗也抗疫，所以瞓身去盡，勢要演好呢場抗疫大龍鳳。就算抗疫交白卷，護民冇料到，表面工夫都要交足戲，費事激起民憤，火燒連環船，牽引出其他政治問題，尤其係七一將至。
立法會休會在即，跟住放暑假，本來係班高官放長假嘅黃金檔期，但今年情況可能有變。旅遊事務專員方舜文尋日喺個場合上坦言想放假叉電，但疫情緊張，要睇政府最高層肯唔肯放人。即係話，方舜文做好晒心理準備，為疫情犧牲假期。
其他有份參與抗疫嘅局長，好似花名「每周一鑊」嘅食物及衞生局局長周一嶽、主管出入境政策嘅保安局局長李少光、拍板學校停課復課嘅教育局局長孫明揚，同埋睇實疫情對本港經濟影響嘅商務及經濟發展局局長劉吳惠蘭，全部口徑一致，透過新聞秘書回覆，短期內都冇計劃放長假，除咗必要嘅公幹出差外，唔會離開香港。
高官綑綁式返工，呢個暑假，下亞厘畢道肯定好熱鬧！