13/06/2009

播放本新聞相關短片

政情:CY暑假遊兩手準備

暑假將至,好多家長都計劃同仔女外遊,尋日新界社團聯會舉行成立二十四周年會慶晚宴,見到行政會議召集人CY梁振英,佢話佢都唔例外,仲做定兩手準備。

CY話好喜歡到內地旅行,以前未有細路時,趁工作冇咁忙,經常到內地旅遊,好似去雲南咁,由昆明坐成日車到石林觀光,感受難忘,但中國地大物博,當然仲有好多地方未去過啦,所以嚟緊暑假其中一個旅遊大計,就係去行絲綢之路。

行絲路都幾辛苦㗎喎,擔唔擔心三個仔女捱唔住呀?佢笑笑口咁話:「啲細路都大囉,應該照顧我哋老人家就差唔多!」至於另一旅遊方案就係去非洲,佢想去東非肯尼亞以外幾個國家探討吓,主要係睇野生動物。