首先撲出嚟嘅係富貴黨主席劉健儀，佢猛讚搞發展機遇辦事處係新思維，近年罕見，值得支持。

跟住輪到「旅遊超人」阿Paul謝偉俊出場，佢一改平日文質彬彬嘅形象，好似「男版卿姐」陳偉業上身咁，粗聲粗氣咁話：「大佬，改革都要時間㗎！畀時間試吓啦阿哥！」簡直出晒位。

跟住佢仲赤裸裸咁話百分之一千贊成開呢個位，仲反諷泛民「要老婆靚，又要利是平」，即刻畀財委會主席劉慧卿提醒要小心講嘢，佢惟有講多句「又要老公靚仔，又有錢」戥勻，以免性別歧視。

阿Paul講得誇？再誇張啲都有。工聯會嘅潘佩璆仲大搞個人崇拜，讚林鄭嘅氣魄值得敬佩，明知山有虎，偏向虎山行喎，十足林鄭粉絲咁。

KK明唱反調暗開路

潘醫生嘅盟友KK黃國健初時質疑好多嘢應該喺事務委員會傾晒，唔應該喺財委會傾，但見大家問得咁開心，佢都講句：「吓！咁都得？」佢話既然咁多人指摘勾結，咁會唔會自縛手腳，令辦事處成為另一個官僚架構，前怕虎、後怕狼，縮手縮腳？

咪以為KK係唱反調，其實係開條路畀林鄭入位，佢話從來都尊重議員，自己唔係數票嘅官員，會視反對為提點，唔會窒礙決心。

最後結果係點？二十七票贊成，十三票反對，通過開位。其實，班保皇一族只要坐定定，就算唔出聲，只要舉手就過到啦，使唔使做啦啦隊咁肉麻呀？