金融海嘯同豬流感打沉香港旅遊業，尋日香港有個國際旅遊展，好多國家嘅官方旅遊機構、航空公司同旅行社都有參展，場面幾墟冚，但商務及經濟發展局局長劉吳惠蘭因為畀煲呔曾拉去出席對抗豬流感嘅督導委員會會議，於是搵咗副局長蘇錦樑去做替工。
喺旅遊展致完辭，蘇錦樑巡埋參展攤位至走，佢顯得小心翼翼，見到推銷當地旅遊嘅各國美女都好避忌，跟住佢仲透露嚟緊會放假添！
佢打政府工至今一年，最長嗰次假期都係得三日，而佢所講嘅假期，聽聞將由下個月十日放到二十五日。乜事要放長假？咪係佢個喺倫敦讀醫嘅囝囝下月戴四方帽，於是佢請假飛去觀禮囉，仲計劃請囝囝上郵輪旅行慶祝，做番幾日廿四孝老竇添！
