立法會勞工界代表李鳳英早前喺立會大樓碌落樓梯跌至盆骨爆裂，依家好番晒，但荷包嘅傷勢亦唔輕，各項醫藥費加埋高達十七萬元，但議員喺法律上並唔算係僱員，根本冇僱主可代佢哋購買勞保，最多只可申領每年二萬幾蚊嘅議員實報實銷醫療津貼。
最慘嘅係英姐竟然老貓燒鬚冇幫自己買醫療保險，要自掏荷包畀番嗰接近十五萬元差額，對嚟自基層嘅英姐構成一定壓力。
「象哥」黃定光喺上屆立法會亦因睡眠窒息症而動過手術，當時連醫療津貼都未有，自然好同情英姐，於是自告奮勇去信行管會要求討論，點知一問就揭發更多問題。原來依家各非官守行會成員同十八區區議員亦係同立法會議員一樣，冇資格亦冇資源購買勞保，即使佢哋係因工喺政府物業內跌傷，好可能一毫子都冇得賠。
行政署喺接獲有關查詢後，已立即向律政司尋求法律意見，稍後會同行管會匯報結果，睇吓有冇方法可堵塞呢個漏洞。換言之，象哥一次過幫晒行會、立法會同區議會議員出頭。