江蘇省民企無錫嘉創科技有限公司捐贈一百萬人民幣畀理工大學工業中心，有「理大秋官」之稱嘅理大校長唐偉章尋日接受支票。既然有朋自北方來，身為主人家嘅秋官自然好識做，即時「轉台」用「煲冬瓜」致謝辭。
秋官長年住喺美國，開口埋口都係講雞腸，所以選擇用普通話致辭時，同事都笑問佢有冇困難，秋官就好幽默咁講：「我冇困難，係你哋有困難﹗」因為佢擔心普通話發音唔準，大家會聽得好辛苦喎。
其實，秋官都好用心㗎，發現佢事前準備份講稿，喺每一個字上面都寫上普通話拼音，雖然佢致辭時頻頻瞄貓紙，仲係逐個字讀出嚟，但整體而言都講得幾流暢，而且咬字仲好清晰添。
