12/06/2009

播放本新聞相關短片

政情:打擊校園濫藥唔等得

政府高層曾經講過,喺唔少國家都出現豬流感人傳人嘅個案後,香港好難獨善其身,話咁快,政府尋日就宣布幼稚園同小學停課,政府仲吹噓呢次係成功將豬流感本地個案感染推遲咗添!

尋日遇到有「庸官殺手」嘅前問責高官王永平,問起點睇政府就豬流感所制訂嘅應變措施時,平叔話有啲嘢如果喺幾小時內有急速變化嘅話,政府做嘢就要快,好似呢次豬流感咁,政府都算做得快。

強制驗毒議而不決

咪以為平叔收晒火喎,事關佢講唔夠兩句,又向政府發炮,話有啲嘢政府絕對唔可以等到水浸眼眉先嚟做。平叔何所指?咪就係近日嚟連串發生校園濫藥,學生索K事件囉!

校園濫藥問題唔係今日先發生,平叔話政府咁多年嚟諗咗啲建議出嚟,好似強制驗毒咁,拖到依家結果係點?有啲嘢唔等得㗎,依家仲糾纏喺人權問題,正所謂非常情況要用非常手段,有啲國際學校早幾年就掹學生嘅頭髮去驗毒啦!

平叔仲帶點挑戰嘅口脗,叫政府即刻去做民調,話肯定百分之九十九點九嘅家長同意掹學生頭髮去驗毒,事關啲家長會覺得有人幫佢哋監管啲小朋友,冇人監管乜都唔知仲大件事。

其實,市民好清楚睇見校園濫藥嘅問題不單止冇改善,仲有惡化嘅迹象添!早排有立法會議員開過聲,全國人大常委范徐麗泰亦叫政府打擊校園濫藥問題,唔好淨係攞啲錢出嚟就算,要攞個心出嚟做。

呢個政府做錯嘢淨係識補鑊,但有威就攞唔切,認叻最快,依家平叔開腔,都係批評政府做嘢一手快、一手慢,既然豬流感可以做得快嘅話,咁打擊校園濫藥就唔好再議而不決,決而不行,最後累死啲學生。

直擊人類豬流感最新疫情
詳情瀏覽on.cc《奪命流感》