睇嚟呢個聯合行動認真神勇喎，以為咁就已經打殘咗深水埗嘅鹹碟活動，小朋友唔使再被荼毒啦。

叮！話口未完，已經有人嗌：「老細老細，四仔四仔，一百蚊四隻，堅嘢嚟(口架)。」呀！呢次仲激，有不法分子喺正深水埗鴨寮街公廁門外，公然攤晒出嚟任人買。賣四仔仲揚過賣牛雜，真係世界變咯！

本報記者去睇過，見到兩個機動部隊警員剛好行過，嗰一刻，仲以為會上演「PTU之怒冚四仔檔」啦！點知差人掂行掂過，唔單止冇冚檔，連眼尾都唔望一眼。而四仔檔見差人行過都好老定，連負責幫四仔檔睇水嘅「天文台」都冇單聲叫收檔，可見佢哋一早已經睇穿警察叔叔唔會執法，當然唔將佢哋放在眼內。

叮，警察就話闊佬懶理啫，咁跟住殺到嚟嘅食環署小販管理隊又點呢？食環署人員蝦老弱婦孺至拿手，對四仔檔竟然格外開恩，明明知道佢哋賣緊嘅係鹹碟都唔理，求其叫佢哋唔好阻街就算。立法會議員王國興直斥事件說明政府部門各自為政嘅服務態度，完全唔可以接受！

計太一叮話齋，政府部門互相卸膊唔拉人固然係唔可以接受，其實最唔可以接受嘅係影視處至真，佢哋負責管制色情及不雅物品，竟然對通街有得賣嘅四仔視而不見，真係抵叮到極！

鬼咩，本報曾經報道過，影視處巡查員原來唔使周圍睇吓邊度有淫褻物品，一個二個出咗影視處門口就各有各蛇，唔係去茶樓品茗就係去戲院睇戲，咁嘅筍工，邊度搵呀？

偷懶蛇王都不特止嘞，最弊係呢個影視處有正經嘢唔做，最叻就係麻鷹唔管管雞仔，竟然白癡到將藝術傑作大衞像當不雅而送檢，但對於真真正正害人不淺嘅四仔淫褻物品，影視處又扮盲喎，你話奇唔奇吖？

不過又難怪喎，影視處任得四仔賣通街，或者有佢嘅道理。依家互聯網色情資訊好似冇王管咁，青少年使鬼落街買咩？

最令太一叮把幾火嘅係，影視處唔知點解成日夾埋淫審處包庇縱容壹淫媒。以一張英國女星Kelly Brook性感照為例吖，《東方日報》及《太陽報》打晒格仔，仍被評為二級不雅，但《蘋果日報》用咗同一輯相就被評為一級。有本香港有得賣嘅外國雜誌《NOW》連格仔都唔打，送檢都唔使。處長鄭美施仲擘大眼講大話「絕不會選擇性檢控」添！

叮！呃鬼呀？壹淫媒過百次定罪，過百次放生，劑劑罰雞碎咁多錢就算。真係同人唔同命咯，睇睇其他刊物吖，被評為三級之後，監都有得坐呀！

叮佢個鎯鎯，有咁不務正業嘅影視處喺度，社會風氣又點會唔亂七八糟吖！唔該鄭美施快啲自動自覺執包袱，再唔係就用膠袋封住自己，唔好再喺度篤眼篤鼻呀！