立法會廠商會代表林大輝係馬主，啱啱過去嘅賽馬日，佢隻愛駒「更奇妙」出戰時喺賽事途中斷腳，當日就被迫人道毀滅。件事嚟得咁突然，大輝真係始料不及，就喺佢傷心之時，竟然發覺愛駒嘅保險喺呢個月二號到期，佢仲未續保，估唔到五日之後愛駒就喺賽事中陣亡，佢當然一個仙都冇得賠，呢鋪真係傷心又傷金囉。
按照一般馬匹嘅保險賠償計劃，大輝嘅損失可能高達幾十萬元，絕對唔少嘢。大輝解釋，佢幫「更奇妙」買重保險，每年保費至少十萬八萬銀，條款包括愛駒唔好彩戰死沙場就有得賠，點知呢排太忙，冇及時為愛駒續保，結果變咗渣都冇。
講完呢件兩傷事件後，身為中學校監嘅大輝都關注近期接連發現中學生濫藥嘅事，佢話暫時未發現自己間學校有學生吸毒，但希望學生能潔身自愛，同毒品Say No。佢仲批評政府打擊毒品不力，話有必要加強機場及口岸檢查，徹底堵截毒品源頭至得喎。