政府高官掛名出任相關政策機構嘅公職係常有嘅事，但唔少高官只係擺吓款，遇有會議就隱形，早前我哋披露過地政總署署長譚贛蘭喺上屆房屋委員會兩次大會都缺席，出席率係零雞蛋，經此一事後，房委會尋日又開大會，譚贛蘭終現身會場。
尋日嘅房委會舉行周年特別公開會議，由各個委員輪流發言，譚贛蘭冇份發言，但就乖乖哋坐足個半鐘，聽吓各委員嘅高見，聽到悶就托吓腮又托吓頭咁沉思。散會之後，譚贛蘭更走去同委員打招呼，寒暄一番。
房委會去年六月十三號同七月十一號嘅會議，按規定地政總署署長可以委派副署長出席，但譚贛蘭並無咁做，事後有立法會議員批評佢嚴重失職，冇履行職責；公屋居民團體就話佢唔重視房委會，慨嘆房委會連橡皮圖章都不如。