港鐵西港島線工程要迫納稅人嘔多六十七億元出嚟，畀立法會議員斥為「天價」及「搵笨」同「㩒住搶」，不過，運輸及房屋局就堅持如期將撥款提交今日嘅工務小組委員會進行初步表決，局長鄭汝樺（Eva）冒住民望大跌嘅風險都要闖關，博嘅係議員都有死穴。
事關大批港島區選民好希望西港島線盡快上馬同通車，解決交通擠塞問題，又可以提供職位，甚至帶動樓價上升。我哋尋日逐一問過工務小組委員會二十八名委員對撥款嘅最新立場，其中建仔、富貴黨、專業會議同多名建制派獨立議員，都清楚表明會投贊成票；平日對政府諸多批評嘅兩名港島區單打女將，亦屈服於選票壓力表態支持，火速湊夠過半數嘅十五票；即使對造價超支同工程細節有好多不滿嘅白鴿黨、公文袋同工聯會，亦最多只會投棄權。