香港友好協進會成立二十周年聯歡晚宴尋晚舉行，筵開一百六十席，儼然政商界武林大會，唔少大孖沙親身到賀，或由子姪做代表，全國人大常委范徐麗泰、唔再做行政會議成員嘅政協常委「肥龍」許仕仁、福建幫嘅洪祖杭同楊孫西、恒地副主席李家傑等都有出席。
主人家陳永棋話，尋晚嘅活動係向鄭家純同洪祖杭揼心口而來，不過，佢搵純官時，開價只係筵開一百二十圍，點知到頭嚟賓客太多，開多咗四十張枱，佢仲講笑話如果純官唔認數，都唔知點算，會展係新世界集團旗下，總唔會絕情到即刻落閘拉人啩！咁純官又點表態呀？佢只係有啲無奈咁話：「依家都冇得減啦，惟有畀錢囉。」