香港好多愛車之人，旅遊發展局主席田北俊亦係知名辣車法拉利嘅捧場者，為咗將愛駒嘅性能發揮極致，佢更報咗名用三萬大元，去珠海學揸法拉利。不過，尋日忽然落起滂沱大雨，田少好擔心呢個咁「好玩」嘅駕駛課程係咪可以如期舉行。
田少尋日同傳媒飯敍，透露佢揸咗法拉利已經好多年，但法拉利車廠認為一般車主只識用部車一半嘅功能，另一半就嘥咗，所以田少報咗個兩日一夜、學費三萬蚊嘅課程。
講完揸車後，田少尋日都為旅發局出嘅《『叮叮』香港電車地圖》做宣傳，話佢都係電車迷，最愛由中環搭「叮叮」去金鐘，貪佢夠順路，唔似坐其他車咁左兜右兜。