KK尋日講起鏹水彈都語帶憂心，佢話警方三點鐘啟用天眼，五個鐘後就有人掟鏹水彈，係咪畀人剃眼眉呀？警方必須盡一切辦法、不惜一切代價去破案，因為呢件事已唔係面子問題，而係影響無數市民生命安全嘅大事。佢仲忍唔住揶揄政府：「政府真係要盡快黐番啲鬚同眼眉上去先得喇……」

佢仲話，呢輪旺角行人專用區同鬧市一再發生鏹水彈事件，警方一日未拉到兇手，都唔係太安全，工聯會或者都要研究喺旺角擺攤位係咪安全，唔好搞到同事無啦啦受傷。

社會治安嚴正警號

小市民同遊客慘變鏹水彈事件嘅人肉出氣袋，有啲人雖然表面傷痕好咗，心底嘅恐懼卻有排醫。專家同社會人士呢輪七嘴八舌研究掟鏹水彈者嘅意圖，有人話佢對社會不滿，攞行人出氣；亦有人話佢對政府同警方不滿，所以明剃警方眼眉；更有人話經濟差，唔知係咪啲邊緣人士唔鍾意睇到人哋行街享樂有關。

講到尾，種種原因都離唔開政府管治無方、救經濟又無力等，所以，邊啲人被剃眼眉同鬚，真係唔使畫公仔畫出腸啦！三宗鏹水彈事件，對本港社會治安係一個嚴正警號，因為安居樂業係民之所求，旅遊購物更係本港經濟命脈所在。事件發生後，市民無法安居，更唔敢安心行街，遊客亦遲早被嚇到唔敢閒步街頭、購物賞景，所以鬚眉男兒真係要全力緝兇至得。