依家個市衰到貼地，行行搵食艱難，原來中式包點呢行仲衰多二錢，近排生意突然唔見咗一半。搞成咁，唔係因為金融海嘯，而係食環署旗下嘅食物安全中心靠害，隨口噏當秘笈。

食安中心上月底公布市面食物鋁含量風險評估結果，話二百五十六個樣本入面，有九成七含鋁，其中包括馬拉糕等多款用泡打粉做嘅中式包點。呢類包點市民食咗幾十年，食安中心依家先至話有問題，簡直靠害。唔講唔知，原來攝取過量鋁，會導致睾丸變形不育或影響妊娠期長短，聽到都怕怕啦。

更大整蠱嘅係，食安中心呢頭講到啲包點好似毒藥咁，嗰頭又話港人從食物攝入鋁嘅分量冇超出世衞標準，唔使改變飲食習慣。咁即係點吖？神係佢，鬼又係佢，乜都畀佢玩晒啦！

報告一出，好多專做包點嘅小商戶生意暴跌，慘過海嘯。佢哋焗住要四圍去搵冇問題嘅物料頂檔，點知政府根本冇法例監管食品嘅含鋁量，亦冇相關指引，商戶都唔知邊隻牌子用得，邊隻有問題，邊隻合法，邊隻違法。有位中式蒸包連鎖店嘅師傅質問：「冇咗生意可以搵邊個算帳？」

叮！依家連內地都有針對食品含鋁量嘅法例，聯合國糧農組織同世衞組織○六年已經調低咗對鋁每周可容忍攝入量，但係香港就乜嘢都冇做過。食安中心有報告、冇跟進，仲一味靠嚇，完全係唔負責任，添煩添亂。

其實政府一貫後知後覺，有邊次唔係爆出大鑊至做嘢吖？如果佢哋真係關心市民健康嘅，早就應該按照聯合國同世衞標準制訂適合本港嘅法例喇，使乜次次執人口水尾，有事至出聲吖。

遠嘅唔講，舊年內地爆出三聚氰胺毒奶事件，問題食品已經流入本港，點知政府淨係針對奶類做測試，而唔係全面化驗麵包同餅乾呢類奶製品。直到有入口嘅餅乾被驗出含有三聚氰胺，畀市民狂炳，政府至拿拿臨話要加快立法，呢啲咪叫做後知後覺囉。

仲有，大家記唔記得孔雀石綠吖？○五年南韓驗出來自中國嘅鰻魚製品含孔雀石綠，禁止呢類食品入口，但本港遲遲都冇動作，連相關化驗都冇做。直到廣東當局回收出口鰻魚製品，港府第二日至急急腳刊憲立例，禁止本港出售含孔雀石綠嘅食物。

叮！食品安全同港人健康息息相關，政府居然當兒戲，踢一踢郁一郁，一日唔出事都唔主動做嘢。食物檢測係咁，預防措施又係咁，制訂法例同樣係咁。請問食環署署長卓永興，你究竟知唔知自己嘅職責係乜嘢㗎？你又對唔對得住納稅人吖？

食環署發言人話喎，食安中心正草擬含鋁食物添加劑嘅使用指引。叮，仲有冇再遲啲吖！